無厘頭撞鬼

garyexe

時間：98年10月‧地點：灣仔‧人物：阿君、小儀

阿君係同我一齊長大o既鄰居，我o地住o係灣仔o既一幢舊樓度。阿君o既志願一路都想o係娛樂圈工作，上個月佢終於得償所願，做o左某歌星o既助手，俗稱保母。呢份工令佢日夜顛倒，晚晚起碼成三、四點先返屋企。

呢日我一直擔心o既事終於發生，阿君出o左事。佢o係樓梯間被樓上一個每朝六點鐘去晨運o既阿婆發現。當時佢衣衫破爛，神志不清，身上露出好多條青瘀色o既疤痕，不停咁打冷震，個口不停咁講：「唔好、唔好……」

警察接手後，初時以強姦案處理。但後來到醫院經醫生檢查後，發現佢完全冇被強姦o既跡象。最奇怪o既係，o係佢身上連一個指紋都搵唔到，究竟佢發生o左乜o野事？

o係醫院探完阿君後，返到屋企樓下時，見到個阿嬸o係度燒衣。一邊燒一邊不停口叫：「老公點解你尋晚咁快走，點解你唔留多陣。」跟住我就不其然咁聯想到阿君o既事，可能同阿嬸死去o既老公有關，唔通阿君尋晚返屋企同佢老公o既鬼魂撞到正？咁邪o既o野真係好大件事。

事實真相只有阿君一人先知，但係佢o既下半生都要o係精神病院中渡過。為免引起恐慌，兼且阿君o既身分與明星拉上關係，會惹來八卦記者採訪，故以極低調手法處理。

李終貴按：真係見到鬼o既話，阿君呢次o既可信性都頗高，起碼傷痕係瘀青色。但另一方面睇，佢衣衫不整，神智不清，有八成可能被強姦後嚇傻，傷痕可能o係佢反抗時撞傷o既。咁奇怪o既事真係好難解釋，要入住精神病院，佢見到o既o野一定非同小可。

不過終貴勸你相信警方，佢o地o既解釋應該比你估o既更有邏輯、更可信