工廠兒童

garyexe

間：1998年6月‧地點：荃灣工廠大廈‧人物：全叔

全叔係一個四十五歲o既中年男人。兩年前曾經o係荃灣一間工廠大廈做看更。每次返工廠大廈，佢都要經過一條又黑又窄o既小巷。小巷o既路旁有一個土地，望落有o的似神主牌。全叔每次返工放工路經呢條巷，就必定急急腳行過。

一晚全叔如常返工。工廠共有十三層，佢由頂樓落，逐層逐層巡樓。通常工廠樓梯長年累月都會冇乜人行，而且又黑又陰。當佢行到七樓時，怪事就發生。佢聽到有細路仔o既笑聲，跟住有一團白色煙，大概係一個細路o既高度，突然向佢o既方向飄過o黎，逐漸變大。佢被嚇到連棍同電筒都唔要，立即從側門逃走。跟住立即用對講機叫伙計救佢。

第二日，佢辭工唔做。後來聽講工廠大廈以前有個工人曾經帶自己o既仔返工，正當工人開工時，個仔亂咁走o黎走去，結果發生意外死o左。

李終貴按：終貴以前曾經去過澳門，o個陣住o係親戚度。有次出街，佢叫我睇o下坐o係另一邊o既一個男人。落車後佢話我知。呢個男人以前曾經o係工廠區姦殺過一個女仔。殺完後仲將個女仔吊o係後樓梯，手法好殘忍。

由於案發時佢未夠秤，所以只係輕判監禁廿年，仲有機會重見天日。終貴問親戚點解仲認得佢，原來呢個人一家住o係親戚樓上。案發後，一到半夜，終貴親戚成日聽到天花板有人行o黎行去。終貴親戚忍唔住去管理處投訴，個管理員話：「佢o地成家人，每晚冇覺好睡。事關一關燈，成日見到有條人影o係牆上出現。呢家人仲百病纏身。佢父母仲齊齊o係同一晚中風。

終貴唔相信一定係犯o左鬼神，一人做事一人當，點解要累及佢屋企人？不過因為一念之差，害人害物，搞到家人咁，一定要引以為鑑。