凶宅遺害新住客B

garyexe

April屋企o岩o岩獲派天平村公屋，雖然o係上水區，但係離火車站只係十零分鐘路程，所以都算幾方便。April屋企總共有五位家庭成員，除o左父母之外，仲有一個家姐同一個細佬。家姐已經畢業，April今年中六，而細佬就讀緊中五。搬入新屋之後，一直都相安無事，直至兩個月後一日朝早，屋企突然間傳出爸媽o既嗌交聲。

「衰婆！你再賭錢我就同你離婚！」April爸爸一邊大力咁推April媽，一邊大聲嗌。April三兄妹聽到嗌交聲之後，即刻走出廳。「阿媽連牌都唔識打，點會賭錢呀﹖」April家姐一邊拉住媽媽一邊講。「佢就係打牌，連今個月o既家用都輸晒！」April難以置信地望住媽媽，覺得媽媽好似變o左另外一個人咁樣。

自此之後，April屋企就家無寧日，終於唔夠一個月，爸爸離開屋企之後再冇返o黎，而媽媽亦o係入伙四個月後o向一個下晝跳樓自殺。媽媽離開之後，姐姐亦o向半年後，o向朋友屋企割脈自殺，雖然最後救返冇事，但家姐決定搬出去住，最後呢個家只係剩低April及細佬。

老實講，自從媽媽離開後，April真係唔想返屋企，因為佢總係覺得屋企已經唔屬於自己，成日陰陰沉沉，企o向門口都已經想走，不過為o左細佬，唯有硬著頭皮留o向度。為o左搵人作伴，April不時叫一大班同學返屋企一齊打機。

「April幫我斟杯水o黎呀！」April見同學阿美同Nina打機打得興起，唯有做住阿四先。不過當April斟完水出o黎，就見到阿美同Nina執晒書包要走。「做乜突然間走呀？又話飲水？」「唔飲啦！都係走啦！」阿美同Nina講完就即刻走，個樣仲好似好驚青咁。

第二日返到學校，April即刻問阿美同Nina尋日發生咩事，點知一問佢o地兩個又嚇到面都青埋。「尋晚咪叫你幫我o地斟水，o向你入廚房o個陣，我見到有個女人跟住你尾，但係你屋企明明冇其他人，我o地越諗越驚咪即刻走囉。你自己小心o的呀！」

聽到同學咁講，April成個晏晝諗o黎諗去，終於決定搵學校o既修女傾訴，「我覺得屋企可能俾邪靈騷擾，修女你要幫我呀！」結果當日April就同學校兩個修女，加埋阿美同Nina一齊返上水屋企。當大門打開之後，真係嚇o左April一跳，佢見到細佬正爬上窗邊o既一張檯度，好似想跳樓咁。幾個人即刻衝過去抱住佢，而佢細佬就好似撞邪咁不斷掙扎。好在最後o係幾個人合力之下，終於將佢制服。但直至送到醫院，細佬仍然不斷喃喃自語，不斷大叫要死，仲話有人等緊佢。雖然精神科醫生話佢係因為考試壓力，加上家庭巨變以致精神崩潰，但係在場幾個同學連同兩個修女，都覺得佢係俾邪靈上身。

當細佬住院期間，教會中o既傳道人員已經到o左April屋企潔淨，但由於仍然怕再被騷擾，所以April連同細佬搬到家姐屋企住。

事後問返細佬點解要自殺？他話淨係記得有一個女人企o向窗口度，同佢講媽媽o向度等緊佢，於是佢就爬出窗口。後來又問o下April家姐最初點解要離開屋企，她話原來係之前每晚返屋企o個陣，都會見到一個中年女人企o向電梯口，好似o向度等緊佢，令佢覺得好驚；屋企又總係陰陰沉沉咁，所以先至離開。家姐同細佬口中o既女人，身穿灰色長褲、米色上衫，手中拎住一個銀包，外型同April同學所見到o既女人完全吻合。

後來April問o下一o的街坊，佢o地竟然話呢一個女人，應該係 April而家所住單位o既上手住客，後來因為好賭而被騙徒呃晒o的錢，卒之跳樓死o左。可能因為April屋企人住o左佢間屋，所以個女人搵佢o地做替死鬼，好彩April係教徒，先至可以避過一劫。但April以後租屋住之前，就會小心查清楚過往歷史，唔會再租凶宅喇！

天平發生自殺地點

天喜樓 ?天祥樓 ?天明樓 ?天朗樓

98至99年共發生五宗自殺事件，全部都係跳樓自殺。其中更發生同年同日跳樓事件。係咁橋定係有鬼魂作祟﹖

最轟動事件

1998年10月2日

新界上水天平村天明樓14樓

「現代陳世美」陳健康涉嫌「包二奶」，佢老婆憤然攜同兩名子女跳樓。上址現時仍然空置。

防住凶宅錦囊

1.切勿o向屋內掛上風鈴，因為風鈴係會招惹「污糟o野」。

2.睇樓時間，最好揀陰天甚至落雨天時先去，因為呢個時候「污糟o野」容易蒲頭，有乜一次過見晒仲好。

3.貓、狗同BＢ都對「污糟o野」好敏感，帶埋佢o地去睇樓，就等於帶o左個法師一齊，只要佢冇事就等於間屋冇事。

4.可以o既話，應該將上手住客o既舊傢俱、雜物棄掉，尤其係神壇同利是，因為上手供奉o既神仙未必對你有利，到住落先搞你就唔抵啦！

5.簽約時訂明「屋內如有『污糟o野』、鬼魂作祟等，業主要賠租兼准租客即刻搬走」，業主唔肯就寧願唔租。

6.如果知道間屋附近或者間屋本身發生過命案，就千祈唔好租。除非你好似大埔炸屍案o既單位業主一樣係教徒，仲將單位用作教會會所，咁就安全。