雪櫃疑魂

garyexe

時間：2001年8月

地點：尖沙咀便利店

我地以前曾經o係便利店做過。你知喇，o的人以為做夜更可以偷懶，但係我o地成班同事，最多都淨係會圍埋講返o的恐怖o野。

試過有睇夜更o既同事話，佢有一年盂蘭節月份，望出門外，成條街人影都冇個。但係冇幾耐見到有一班成二、三十個小朋友，好似排隊咁一個跟一個，o係對面馬路經過。個個都著住白灰色o既袍，最恐怖係唔見對腳。佢見過之後病足半年。

唔知係咪因為聽得多，搞到我成日疑神疑鬼，所以以下發生o既呢件事，我都唔敢肯定我係咪見鬼。

記得o個晚係星期三，冇咩客，到o左四點鐘左右，有一個女人走入o黎，佢面青青咁，我地以為佢係「雞」，所以都冇點望佢。

佢一入o黎就行去雪櫃度，打開雪櫃好耐，我地以為佢唔知揀咩o野飲，但係佢打開雪櫃成幾分鐘，個人仲係企o係度唔郁。

我忍唔住問佢：「小姐，有咩可以幫你？」

佢冇答我，即刻耷低頭。我想行過去，但係聽到門口有聲，所以好自然反應又望番門口，我見到自動門打開，但係冇人走入o黎，o個時我突然覺得好似有一陣涼意，個身震一震，回頭再睇雪櫃o個邊，咦，正話企o係度o既女人去o左邊？

明明冇第二條出路，佢冇可能行到出去。

到落班時，企o係巴士度等車，因為天氣熱，出晒汗，我突然間閃過個女人打開雪櫃o既情景，先開始知驚：

唔知佢係咪因為過慣陰涼o既生活，o係條街度「游」得太耐所以覺得熱，特登入o黎嘆冷氣，仲打開埋雪櫃……

之後，每次自動門自動打開又冇人走入o黎時，我都會心寒，份工做多一個月就冇再做啦